بحث هذه المدونة الإلكترونية

إجمالي مرات مشاهدة الصفحة

الثلاثاء، 2 فبراير 2016

الباشا و امك

فى صبيحة يوم اربعاء من ايام يناير المطيرة شديدة البرودة نزل عصام باشا نقيب القوات المسلحة مرتدياً بدلته الميرى من بيته و اتجه الى سيارته فئة التويوتا موديل العام ذاهباً الى مقر عمله فى مركز تدريب القوات المسلحة بالمعادى

اوقف سيارته و القى بالمفاتيح للجندى مجند ابانوب عماد الحاصل على ليسانس اداب قسم تاريخ و قال له: اركنلى دى يابنى و هات جردل مية و اغسلهالى غسلة كويسة

و اثناء مروره بارض الطابور متجهاً الى مكتبه رأى المجندين واقفين فى ارض الطابور بالتيشيرتات الصيفية البيضاء و هم يكادون يموتون برداً فى هذا الصباح المطير قارص البرودة.  و لاحت على شفتيه ابتسامة ساخرة عندما سمع صف ضابط محسن عشماوى يعنف جندى مجند 'امجد على' طبيب الاسنان قائلاً له: بردان يا عسكرى يا بيادة؟ تحب اولعلك فى جوز عساكر تتدفى بيهم؟ ماتقف ثابت يا نمرة

عندما دخل مكتبه رفع له التحية جندى مجند 'احمد رؤوف' الحاصل على بكالوريوس اقتصاد فنظر له بتأفف و قال له: القهوة يابنى و بسرعة عشان تروح تجيبلى فطار

جلس على مكتبه و اخذ يتصفح هاتفه الاى فون و وجد 200 رسالة على جروب الواتس آب الخاص بالضباط رفاقه. قرأ الرسائل سريعاً و التى كانت تتحدث عن التجمع السكنى الجديد الخاص بالقوات المسلحة فى المعادى و عن اسعار الشقق و اسعار الفائدة و نظم الخصومات. اخذه التفكير للحظات و ظل يحسب راتبه بعد الزيادات الكبيرة فى الفترة الاخيرة و لكنه مازال يدفع قسط سيارته للقوات المسلحة بخلاف شقة الشيخ زايد و التى فشل حتى الان فى بيعها بمبلغ مليون و نصف المليون جنيه

نظر امامه بعد ان عاد من ذكرياته فرأى القهوة و كوباً من الماء على المكتب. فاستشاط وجهه غضباً و هتف بصوت عصبى انت يا زفت يا رؤوف .. انت يا كلب! هرع اليه الجندى مجند احمد رؤوف و هو يكاد ينهار من فرط الخوف قائلاً: اوامرك يا فندم
قال له عصام بعصبية: يابنى انت القهوة دى من غير زفت وش .. متعكننوش على دين ابونا ع الصبح بقى.. اجرى اتنيل و اعملى قهوة بن تقيل.. و على الله تبقى سكر زيادة و دينى و ما اعبد هافقدك دفعة.. يالا يا عسكرى!
حاجة تحرق الدم ع الصبح!

 اخذ تليفونه و وضع رقم حماه المستقبلى اللواء 'هشام'  الذى ما ان سمع صوته حتى هتف مبتسما: صباح الخير معالى الباشا ... اخبار صحة سيادتك انهاردة؟
الحمد لله يا فندم كله بخير..
اه يا فندم انا فى المركز اهو .. جاى من بدرى و الله انهاردة سعادتك
كان ليا طلب عند سيادتك يا معالى الباشا.. سمعت ان فيه شقق جديدة فى المعادى
اه يا فندم .. يعنى لو ينفع بس زقة من سعادتك .. و اهو كله خير يا فندم
الف الف شكر يا معالى الباشا .. خلاص هاستنا تليفون معاليك
نهارك سعيد يا فندم .. اتفضل.. اتفضل .. مع السلامة

اغلق الخط مبتسماً و امسك فنجان القهوة التى احضرها له الجندى 'احمد رؤوف' اثناء انشغاله بالاتصال و رشف منها رشفة و هو يتصفح الفيسبوك. فلاحت على وجهه ابتسامة عندما قرأ خبراً يتناقله الكثيرون عن علاوات و بدلات اضافية لرجال القضاء و الجيش و الشرطة.. وجد الكثيرون يستهجنون و يتطاولون على من نالتهم الزيادة فى الدخل للمرة التاسعة فى عامين .. فاقتضبت جبهته و ضغط على زر المشاركة و كتب الاتى:

ايه تمن انك تضحى بحياتك عشان انت تنام مرتاح؟ لو انت مستكتر اللى الظباط بياخدوه ابعت امك تقف ع الحدود

ثم اغلق تليفونه و هتف.. انت يا زفت يا رؤوف.. فين الفطار يابنى.. و اندهلى على الزفت ايمن يجيبلى سجاير

تمت